କାନବେରା, ୧।୧୨ : ଟିମ୍ ଇଣ୍ଡିଆର ଅଧିନାୟକ ବିରାଟ କୋହଲିଙ୍କ ନିକଟରେ ରହିଛି ଏକ ବଡ଼ ରେକର୍ଡ ହାସଲ କରିବାର ସୁଯୋଗ। ବିଶ୍ୱର ଏହି ମହାନ ବ୍ୟାଟ୍ସମ୍ୟାନ ଏବେ ଅନ୍ତର୍ଜାତୀୟ ଦିନିକଆ ଫର୍ମାଟରେ ୧୨ ହାଜର ରନ୍ ଠାରୁ ମାତ୍ର ୨୩ ରନ୍ ଦୂରରେ ରହିଛନ୍ତି। ବୁଧବାର ଖେଳାଯିବାକୁ ଥିବା ଅଷ୍ଟ୍ରେଲିଆ ବିପକ୍ଷ ତୃତୀୟ ତଥା ଅନ୍ତିମ ଦିନିକିଆ ମ୍ୟାଚ୍ରେ କୋହଲି ଯଦି ସେତିକି ରନ୍ କରିବାକୁ ସଫଳ ହୁଅନ୍ତି , ତେବେ ଦ୍ରୁତତମ ବ୍ୟାଟ୍ସମ୍ୟାନ ଭାବେ ଦିନିକିଆ ଫର୍ମାଟରେ ପୂରଣ କରିବେ ୧୨ ହଜାର ରନ୍। ଏହା କୋହଲିଙ୍କ ଦିନିକିଆ କ୍ୟାରିୟରର ୨୫୧ତମ ମ୍ୟାଚ୍ ।
ଏହି ରେକର୍ଡ ବର୍ତ୍ତମାନ କିମ୍ବଦନ୍ତୀ ଭାରତୀୟ ବ୍ୟାଟ୍ସମ୍ୟାନ ସଚିନ ତେନ୍ଦୁଲକରଙ୍କ ନାମରେ ରହିଛି। ସେ ୩୦୯ ମ୍ୟାଚ୍ରେ ଏହି ମାଇଲଷ୍ଟୋନରେ ପହଞ୍ଚିଥିଲେ। ତାଙ୍କ ପଛକୁ ଅଷ୍ଟ୍ରେଲିଆର ରିକି ପଣ୍ଟିଂ (୩୨୩ ମ୍ୟାଚ୍), ଶ୍ରୀଲଙ୍କାର କୁମାର ସଙ୍ଗକାରା (୩୫୯), ସନଥ ଜୟସୁରିୟା (୩୯୦) ଓ ମହେଲା ଜୟବର୍ଦ୍ଦନେ (୪୨୬)ଙ୍କ ଭଳି ମହାନ ମ୍ୟାଟ୍ସମ୍ୟାନ ରହିଛନ୍ତି।
ଏହା ବ୍ୟତୀତ କୋହଲିଙ୍କ ନିକଟରେ ଆଉ ରେକର୍ଡର ସମକକ୍ଷ ହେବାର ସୁଯୋଗ ରହିଛି। ଜଣେ ଭାରତୀୟ ବ୍ୟାଟ୍ସମ୍ୟାନ ଭାବେ ସଚିନ ଅଷ୍ଟ୍ରେଲିଆ ବିପକ୍ଷରେ ସର୍ବାଧିକ ୯ଟି ଦିନିକଆ ଶତକ ହାସଲ କରିଛନ୍ତି। ଆଉ ଏହି ରେକର୍ଡର ସମକକ୍ଷ ହେବା ପାଇଁ କୋହଲିଙ୍କୁ ଆଉ ଗୋଟେ ଶତକ ଦରକାର।
